Edhe një futbollist shqiptar në Bundesliga

Sulmuesi i kombëtares shqiptare U-21, Valdrin Mustafa, është bërë me skuadër të re.

Futbollisti 20-vjeçar është transferuar në Hannover 96, në Bundesligën gjermane, përcjell albinfo.ch.

Sulmuesi, me një postim në Facebook, ka shkruar një tekst falënderues për ish-ekipin e tij të mëparshëm, Kaiserslauten, pjesë e të cilit ishte prej katër vjetësh.

“Pas katër vitesh me fanellën e “djajve të kuq”, vendos të nis një sfidë të re. Këto katër vjet me Kaiserslauten më kanë formuar shumë profesionalisht, por dhe si person. Dua së pari të falënderoj tifozët, trajnerët, dhe të gjithë bashkëpunëtorët.

Ju faleminderit që më keni shoqëruar në këtë rrugë dhe më keni përkrahur plotësisht. Pres me padurim sfidën time të re me Hannover 96, duke shpresuar se do vazhdoni të më mbështesni me të gjitha energjitë”, është shprehur Mustafa.

Në Hannover aktivizohet edhe mesfushori shqiptar Florent Muslija.