OSBE shpreh shqetësim për përfshirjen e RTK-së në ligjin e pagave

Misioni i OSBE-së në Kosovë ka shprehur shqetësimin rreth përfshirjes së punonjësve të Radio Televizionit të Kosovës (RTK) në Ligjin për Pagat e Sektorit Publik, të miratuar më 2 shkurt.

“RTK është një transmetues publik i pavarur, me dispozita kushtetuese dhe ligjore që mbrojnë pavarësinë editoriale dhe financiare. Përfshirja e RTK-së në Ligjin për Pagat e Sektorit Publik minon pavarësinë e RTK-së dhe statusin e transmetuesit publik. Gjithashtu, ai i drejtohet pyetjeve lidhur me respektimin e standardeve relevante ndërkombëtare për transmetuesit e shërbimit publik, të cilat janë të sanksionuara në Kushtetutën e Kosovës dhe kuadrin ligjor”, ka thënë përmes një njoftimi Misioni i OSBE-së në Kosovë.

Sipas njoftimit, Misioni i OSBE-së u kërkon ligjvënësve të Kosovës që të marrin në konsideratë ndryshimin e Ligjit për Pagat e Sektorit Publik në përputhje me rrethanat dhe t’i adresojnë çështjet në lidhje me RTK-në përmes ligjit të vet të veçantë, siç është rasti deri më tani.