Mogherini kërkon heqjen e taksës që të nisë dialogu

Shefja e diplomacisë evropiane, Federica Mogherini, gjatë ditës së sotme nga Brukseli ka thënë se pa u hequr taksa ndaj Serbisë, nuk do të ketë kushte që të vazhdojë dialogu në mënyrë të suksesshme.

Ajo shtoi se nëse heqet taksa, ajo do të thërrasë në një takim të menjëhershëm presidentin kosovar, Hashim Thaçi dhe atë serb, Aleksanda Vuçiq.

“Derisa të ndodhë kjo, unë nuk shoh se ka kushte për një rund të suksesshëm dialogu. Në momentin që përmbushen kushtet, jo vetëm që jam në dispozicion të nisim dialogun qysh në mëngjes, por edhe të mbyllemi për sado që duhet, një javë, një muaj apo tre muaj”, tha Mogherini.

Mogherini pas takimit me ministrat e BE-së tha edhe se kushti bazik për të vazhduar dialogun mes Kosovës dhe Serbisë është që kosova të heqë taksën e vendosur në muajin nëntor të vitit të kaluar, shkruan albinfo.ch.

Në anën tjetër, Kryeministri kosovar, Ramush Haradinaj, vazhdimisht ka deklaruar se taksa ndaj Serbisë nuk do të hiqet përveç në rast se Serbia do ta njohë Kosovën.