Familja e këngëtarit Michael Jacksonit padit HBO

Familja e mbretit të popit, Michael Jackson, ka njoftuar se ka paditur kompaninë HBO për shkak të dokumentarit “Leaving Neverland”, ku thuhet se këngëtari abuzoi seksualisht me dy djem të mitur.

Në padinë prej 53 faqesh, paraqitur në Gjykatën e Lartë në Los Anxhelos, janë kërkuar 100 milionë dollarë shpërblim nga HBO për transmetimin e dokumentarit që ishte premierë në Festivalin e Filmit Sundance këtë vit.

“Michael Jackson është i pafajshëm. Në vitin 2005 ai doli në gjyq dhe u lirua nga akuzat. Dhjetë vjet pas vdekjes së tij ka ende njerëz që duan të përfitojnë nga suksesi në mbarë botën i Michael dhe pasuria e tij”, theksohet në padi.

Padia pretendon se HBO në vitin 1992 shfaqi një koncert në Bukuresht nga turneu “Dangerous” i Jackson dhe në atë kohë ka nënshkruar një marrëveshje që ndalon transmetimin e materialeve që dëmtojnë reputacionin e Jacksonit.