Shqipëria dhe Kosova, kurrikula të përbashkëta për Diasporën

Foto ilustrim © 2018 ALBINFO.CH

Ministrja e Shtetit për Marrëdhëniet me Parlamentin, Elisa Spiropali, duke folur sot në një konferencë për shtyp mbi arritjet e Samitit të Dytë të Diasporës, u shpreh se “në fushën e arsimit dhe kulturës falë dhe erës së re të bashkëpunimit që kanë krijuar mbledhjet e përvitshme të qeverisë tonë me qeverinë e Kosovës janë hedhur hapa të rëndësishëm përpara si kurrikulat e përbashkëta, krijimi i një databaze të përbashkët për mësuesit dhe nxënësit e shqipes në botë apo zhvillimi i seminarit të përbashkët të mësuesve të diasporës”, shkruan atsh, përcjell albinfo.ch.

Spiropali theksoi se “pjesë e angazhimit tonë për të rritur vit pas viti buxhetin për arsimin është dhe rritja e buxhetit për të financuar pajisjen me libra dhe bazë materiale si dhe rritjen e financimit për shkollat apo qendrat kulturore shqiptare nëpër botë, në mënyrë që fëmijët shqiptarë të mos humbin kontaktin me gjuhën që është aq i rëndësishëm për të ruajtur identitetin”.