Kosova dhe Shqipëria, me kalendar të përbashkët kulturor

Ministri i Kulturës i Kosovës, Kujtim Gashi, ka pritur në një takim homologen e tij nga Shqipëria, Elva Margariti, në Prizren, ku mes tjerash kanë paralajmëruar edhe nënshkrimin e kalendarit të përbashkët kulturor. 

Ministrja e Kulturës së Shqipërisë, Elva Margariti, tha se ky është vazhdim i një pune mes Kosovës dhe Shqipërisë dhe theksoi se mbështetja për artistët do të jetë e vazhdueshme. “Do të ishte më mirë të konkretizojmë që t’i japim shpresë dhe konkretizim artistëve, është detyrë jona që të jemi afër artistëve tanë. Ministria e Kulturës në Prizren është një gjë e mirë që ka ndodhur”, tha ajo, përcjell albinfo.ch.

Ndërsa Gashi ka thënë se në këtë kalendar do të futet edhe Maqedonia.

“Po ashtu kemi diskutuar për një fond të përbashkët të vitit 2020 që të kenë fonde të mjaftueshme dhe ky fond të jetë në dispozicion për artistët”, u shpreh Gashi.