Shqipëria, vend transit i drogës

Departamenti Amerikan i Shtetit ka dorëzuar në Kongres raportin vjetor për strategjinë e luftës ndërkombëtare kundër narkotikëve. Në pjesën për Shqipërinë, DASH-i thotë se ky vend është njëkohësisht burim i kanabisit dhe, gjithnjë e më shumë, një vend transit për kokainën dhe heroinën. 

Në këtë raport që mbulon vitin 2018, Departamenti i Shtetit thotë se transiti i kanabisit, si dhe i drogave të forta komandohet kryesisht nga elementë të krimit të organizuar që transferojnë droga të paligjshme nga vendet burim për në tregjet evropiane. 

Sipas raportit, roli i Shqipërisë si burim apo treg për droga të paligjshme përtej kanabisit, është i vogël, por ka pasur një rritje në konfiskimet e kokainës që kalon nëpër Shqipëri për në Evropë, përveç zbulimit të laboratorëve të përpunimit të heroinës dhe kokainës në Shqipërinë veriore dhe qendrore, përcjell albinfo.ch.

Korrupsioni zyrtar, thuhet aty, është i përhapur dhe nxit një mjedis, në të cilin trafikantët e drogës janë mjaft të aftë të veprojnë pa u ndëshkuar. Sipas raportit, përpjekjet për të çrrënjosur kanabisin dhe ndjekur penalisht kultivuesit e tij kanë qenë të gjera, por jo kudo njëlloj.