Prijnë turqit, nga të huajt që kërkojnë qëndrim të përkohshëm në Kosovë

AP Photo/Visar Kryeziu

Gjatë viteve 2013-2017 janë regjistruar 4975 kërkesa për vizë hyrëse në Republikën e Kosovës, sipas raportit “Profili i zgjeruar i migrimit 2013-2017” të Ministrisë së Punëve të Brendshme të Kosovës.

85 për qind e këtyre kërkesave janë aprovuar, e pjesa tjetër është refuzuar, shkruan albinfo.ch.

Po ashtu, gjatë kësaj periudhe Republika e Kosovës ka lëshuar 18042 vendime për leje qëndrime të përkohshëm për shtetasit e huaj.

Sipas statistikave të këtij raporti, ky numër ka shënuar rritje nga viti në vit.

Arsyet më të shpeshta për leje qëndrim të përkohshëm kanë qenë bashkimi familjar, punësimi dhe studimet.

Gjatë kësaj periudhe, më së shumti lejeqëndrime kanë marrë shtetasit nga Turqia (34.3%) pasuar nga Shqipëria (23.3%), Serbia (11.3%), Maqedonia (9.2%) dhe ShBA (5.4%).

Ndërkaq, kërkesat për lejeqëndrim të përhershëm në Kosovë gjatë kësaj periudhe kanë qenë dukshëm më të vogla dhe nuk kanë ndryshuar shumë nga viti në vit.

Për periudhën 2013-2017, në Kosovë janë regjistruar 316 leje qëndrimi të përhershme.

Përndryshe, imigrimi i rregullt i shtetasve të huaj në Kosovë  rregullohet me anë të Ligjit për të Huajt, që ka hyrë në fuqi në vitin 2013.  Ky ligj rregullon kushtet e hyrjes, lëvizjen, qëndrimin dhe punësimin e të huajve në territorin e Republikës së Kosovës./Albinfo.ch/