Gjermania dhe SHBA-ja kanë qëndrim të njëjtë ndaj Kosovës

Një shkrim në gazetën serbe “Blic” ku thuhej se SHBA dhe Gjermania kanë qëndrime të ndryshme ndaj Kosovës, ka bërë që këto dy të fundit të dalin me një deklaratë të përbashkët.

Ambasada e Shteteve të Bashkuara të Amerikës dhe ajo e Gjermanisë kanë reaguar duke thënë se këto dy vende nuk kanë dallime në qëndrimin e tyre ndaj shtetit të Kosovës.

Teksti i reagimit të ambasadorit amerikan Scott dhe atij gjerman Schieb:

“Artikulli që e keni publikuar në faqen e parë të ‘Blicit’ më 5 prill është përpjekur të tregojë mospajtimet serioze ndërmjet Shteteve të Bashkuara të Amerikës dhe Gjermanisë lidhur me politikën në Ballkan.

Kjo gjë është larg nga e vërteta.

Edhe SHBA-ja e edhe Gjermania vazhdojnë ta përkrahin dialogun që zhvillohet me ndërmjetësim të BE-së. Ne jemi të përkushtuar ndaj synimit për arritjen e marrëveshjes gjithëpërfshirëse dhe ligjërisht të detyrueshme për normalizimin e marrëdhënieve ndërmjet Kosovës e Serbisë e të zbatueshme për t’i kontribuuar stabilitetit rajonal.

Jemi të pajtimit se të dy palët duhet të bëjnë përpjekje për t’i hequr pengesat, t’i evitojnë provokimet e ndërsjella dhe të kthehen në negociata me gatishmërinë që të arrijnë marrëveshje.

Në këtë kuptim, SHBA-ja dhe Gjermania mendojnë se Kosova duhet ta heqë taksën ndaj mallrave të Serbisë e Bosnjë e Hercegovinës, janë të përcaktuara që edhe më tej t’iu japin përkrahje përpjekjeve që shpien te dialogu, pajtimi dhe marrëdhëniet miqësore ndërmjet të gjitha vendeve të Ballkanit Perëndimor”, theksohet në reagimin e përbashkët të nënshkruar nga ambasadorët Schieb dhe Scott.