Sa leje pune lëshoi Kroacia për qytetarët e Kosovës?

Hapja e mijëra vendeve të punës për të huajt e ka shndërruar Kroacinë ndër destinacionet kryesore edhe për kosovarët

Prej fillimit të këtij viti, rreth 1 mijë e 300 qytetarë nga Kosova kanë marrë leje qëndrimi dhe pune nga Ministria e Punëve të Brendshme e Kroacisë, shkruan sot “Koha Ditore”.

Në fund të vitit të kaluar, Qeveria kroate ka miratuar një vendim mbi përcaktimin e kuotës vjetore për punësimin e të huajve për vitin 2019.

Në Ambasadën e këtij vendi në Prishtinë kanë treguar se kuota totale për vitin 2019 është 65 mijë leje të punës, përfshirë vazhdimin e lejeve ekzistuese, përcjell albinfo.ch.

Prej tyre, 15 mijë do të jenë vazhdim i lejeve ekzistuese, ndërsa 50 mijë e 100 sosh leje të reja.

“Shumica e lejeve janë të parapara në sektorin e ndërtimit (17.800) dhe në turizëm e hoteleri (10.611), kurse për turizëm sezonal janë të parapara 5.000 leje”, i kanë thënë gazetës në Ambasadën kroate.

“Zyra konsullore (në Prishtinë v.j.) nga fillimi i vitit ka marrë rreth 1.300 kërkesa për viza në bazë të lëshimit të lejeve të qëndrimit dhe punës nga Ministria e Punëve të Brendshme të Kroacisë”.

---