Kryeministri i Kosovës: “AAK-ja, e gatshme për zgjedhje”

Kryeministri i Kosovës, Ramush Haradinaj, ka thënë se AAK-ja është e gatshme të shkojë në zgjedhje, kurdo që ato mbahen, por vetëm nëse kjo kërkesë vjen nga njëri prej partnerëve të koalicionit.

“Unë jam i fundit, e lëshoj kontratën, unë nuk tradhtoj askënd”, ka thënë Haradinaj pas mbledhjes së Qeverisë.

Tutje Haradinaj ka folur edhe për kandidimin që PDK-ja i ka bërë Kadri Veselit për kryeministër. Ai e ka quajtur këtë legjitime. Ka komentuar edhe paralajmërimin e Vetëvendosjes për protestë, siç e quajnë ata, kundër “PAN Hajnisë”.

Ai tha se Vetëvendosje kohët e fundit po tregon nervozizëm, sepse e ka humbur besimin në popull. “AAK-ja ka dalë në sondazhe para Vetëvendosjes, sepse ka humbur besimi i popullit në Vetëvendosje e në liderin Albin Kurti, prandaj është ky nervozizëm i tyre”, ka thënë Haradinaj.

Ndërkohë, kur foli për samitin e Berlinit, tha se e ka ndërruar dinamikën.

“Hetohet një ecje me qëndrime. Kemi pasur shkrime në media me renome botërore, në deklarime po ashtu. Nuk duhet ta marrim diçka si përfundimtare. Kjo është një energji e re që po ndodh në prag të samitit”, ka thënë kryeministri.