Për tre muaj, mbi 10 mijë kërkesa për viza zvicerane

Më shumë se 10 mijë banorë të Kosovës kanë aplikuar për viza në Zvicër vetëm gjatë tremujorit të parë të vitit 2019, shkruan albinfo.ch.

Sekretariati Shtetëror për Migracion i Zvicrës (SEM) ka konfirmuar për albinfo.ch se nga 10781 aplikime, 2067 prej tyre janë refuzuar deri më tash.

Po ashtu, gjatë kësaj periudhe janë lëshuar 7435 viza Schengen, kryesisht për vizita familjare dhe për biznes.

“Gjatë muajve janar-mars, janë lëshuar 7435 viza Schengen. 5860 prej tyre kanë qenë për vizita të familjarëve ose miqve, 782 për biznes, 424 për qëllime turizmi, 260 për arsye të tjera, 63 për vizita zyrtare, 35 për arsye mjekësore dhe 11 për studime”, kanë njoftuar nga SEM, në një përgjigje për albinfo.ch.

Ndërkaq, 9900 e këtyre aplikacioneve janë bërë pranë Ambasadës Zvicerane në Prishtinë.

Krahasuar me periudhën e njëjtë të vitit 2018, numri i aplikimeve për viza Schengen nga kosovarët kishte shënuar rënie (1466 më pak se në vitin paraprak).

Po ashtu, gjatë asaj periudhe më shumë se një e treta, ose 34.9% e të gjitha aplikacioneve të refuzuara për viza kishin të bënin me shtetasit e Kosovës, pasuar nga ata të Indisë.

Aktualisht në Zvicër jetojnë  rreth 112,000 kosovarë.