Pensionet e emigrantëve shqiptarë në Belgjikë

35 mijë emigrantë shqiptarë në Bruksel kanë mundësi që brenda këtij viti t’i marrin pensionet në rast se kanë mbushur moshën e pensionimit.

Belgjika është vendi i parë me të cilën Shqipëria ka tashmë një marrëveshje për njohjen e pensioneve.

Ministri i Mirëqenies Sociale dhe Rinisë, Erion Veliaj, tha për mediat e Tiranës se marrëveshje të tilla me shtetet kanë kosto të lartë, por në Belgjikë jetojnë më shumë emigrantë shqiptarë sesa belgë në Shqipëri, ku ka pak të tillë.

Shtetet fqinje që kanë pjesën më dërmuese të emigrantëve shqiptarë janë Greqia dhe Italia.

Për shkak të situatës financiare, këto vende kanë refuzuar të kenë një marrëveshje me palën shqiptare.

Marrëveshjet bilaterale në këtë rast bëjnë që emigrantët shqiptarë pasi plotësojnë vitet e punës të kenë mundësi të marrin pensionet në këto shtete ku punojnë.

Tentativat janë dhe me Luksemburgun, që sipas autoriteteve të Shqipërisë mund të arrihet një marrëveshje së shpejti.

Ndërsa në vendet që janë jashtë BE-së,Turqia është më optimiste për bashkëpunim, por dhe Kanadaja ka dhënë sinjale pozitive për një marrëveshje të tillë.