Kosova përkujton Holokaustin

Shefi i diplomacisë kosovare, Enver Hoxhaj tha se populli i Kosovës asnjëherë nuk kanë pasur një ideologji antisemite

Republika e Kosovës është shumë krenare që komuniteti hebre është pjesë e saj, është pjesë e shoqërisë dhe e institucioneve kosovare. Kështu deklaroi ministri i Punëve të Jashtme, Enver Hoxhaj, duke u shprehur i lumtur që populli i Kosovës iu doli në mbrojtje hebrenjve gjatë luftës së Dytë.

Këto komente Hoxhaj i bëri në akademinë përkujtimore organizuar në Prishtinë me rastin e Ditës Ndërkombëtare të Përkujtimit të Holokaustit.

Ministri Hoxhaj ka thënë se qëndrimi i popullit të Kosovës karshi hebrenjve është pjesë e traditës së tolerancës dhe bashkëjetesës, e cila ka qenë e fuqishme edhe në Luftën e Dytë Botërore, por e cila është e fuqishme edhe sot e kësaj dite.

“Populli i Kosovës në atë kohë, por edhe qytetarët e sotshëm të Kosovës asnjëherë nuk kanë pasur një ideologji antisemite, e cila fatkeqësisht ka qenë e përhapur në disa vende të Ballkanit. Një moment i dytë që e bën të qartë relacionin e Kosovës me popullin hebre, me shtetin e Izraelit, dhe me diasporën hebraike është situata e viteve 1990”, deklaroi Hoxhaj.

Shefi i diplomacisë kosovare përmendi ndihmën e madhe që kanë dhënë shoqëria hebraike gjatë luftës në Kosovë.

“…diaspora hebraike në SHBA dhe në Evropë, jo vetëm që e mbështeti popullin e Kosovës për liri, pavarësi dhe demokraci, por gjatë viteve 1998-99 kanë qenë pjesa më motorike që ndalën spastrimin etnik gjatë kohës që ndodhë intervenimi ushtarak i NATO-së, që populli i Kosovës ta fitojë lirinë e tij”, deklaroi ministri Hoxhaj

 Ai po ashtu theksoi se vitin e kaluar Qeveria e Republikës së Kosovës me iniciativë të MPJ-së pati inauguruar memorialin për viktimat e hebrenjve në Kosovë.

 “Sot jemi mbledhur që ta kujtojmë Ditën Ndërkombëtare të Holokaustit, dhe të gjitha këto flasin që ne duhet të jemi të vendosur që ngjarjet e tilla tragjike të mos përsëriten në të ardhmen as në Evropë, as jashtë saj. Ne jemi shumë krenar që komuniteti hebre është pjesë e Republikës së Kosovës”, tha ministri Hoxhaj.

Ambasadori i Gjermanisë në Kosovë, Peter Blomeyer, në fjalën e tij ka thënë se është obligim i të gjithëve që të parandalohen krime të atilla në të ardhmen, si dhe se represioni i mundshëm, gjenocidi, sikur krimet kundër njerëzimit, krimet e luftës, duhet të parandalohen.