Kosova kryeson RYCO-n në Berlin

Kujtim Gashi (Facebook)

Këtë vit, Kosova po e kryeson RYCO-n në Berlin të Gjermanisë, shkruan albinfo.ch.

Ministri i Kulturës, Rinisë dhe Sportit të Kosovës, Kujtim Gashi, ka njoftuar se ai ka hapur konferencën “Forcimi i Bashkëpunimit Rajonal Parlamentar në mbështetje të RYCO-s në procesin e Berlinit”.

Në këtë konferencë po marrin pjesë deputetë e përfaqësues nga vendet e Ballkanit perëndimor si dhe nga Gjermania e Franca.

Gashi ka njoftuar se në konferencë po diskutohet për rëndësinë dhe rolin ndihmues të parlamenteve në procesin e Berlinit, respektivisht për ndihmën që parlamentet mund ta japin për rininë në përgjithësi dhe RYCO-n në veçanti, përcjell albinfo.ch.

“Potencova se Parlamentet dhe deputetët kanë rol të veçantë dhe domethënës sa i përket ndihmës dhe mbështetjes për të rinjtë, duke pasur parasysh ndikimin që ata mund ta luajnë tek subjektet politike e veçanërisht në parlamentet e tyre. Ata mund të lobojnë dhe përkrahin iniciativat rinore, të cilat kanë për qëllim krijimin e një klime bashkëpunuese dhe bashkëvepruese mes të rinjve të 6 vendeve të Ballkanit perëndimor”, ka njoftuar ministri Gashi përmes një postimi në Facebook.

Regional Youth Cooperation Office (RYCO) është organizatë ndërkombëtare, që ka për synim të promovojë frymën e pajtimit dhe bashkëpunimit mes të rinjve në Ballkanin Perëndimor përmes programeve të shkëmbimit të të rinjve.