Zvicra, vendi i tretë më tërheqës në botë për ekspertët e huaj

Sipas studimit, Zvicra zë vendin e tretë në listën e vendeve të botës që tërheqin më shumë ekspertët e huaj, pas Australisë dhe Suedisë

Zvicra vazhdon të jetë njëra ndër qendrat më atraktive në botë për punëmarrësit me kualifikime të larta ose ekspertët nga jashtë. Këtë e ka konstatuar një studim i realizuar nga Organizata Evropiane për Bashkëpunim Ekonomik dhe Zhvillim (OECD), i publikuar sot, shkruan srf.ch.

Sipas studimit, Zvicra zë vendin e tretë në listën e vendeve të botës që tërheqin më shumë ekspertët e huaj, pas Australisë dhe Suedisë, transmeton albinfo.ch. Ndërsa në fund të kësaj liste, ku janë përfshirë 35 shtete, janë Greqia, Meksiko dhe Turqia.

Për të realizuar këtë studim janë marrë në shqyrtim disa kritere, si: shanset që shtetet e caktuara ofrojnë për inkuadrimin në profesionin e tyre të ekspertëve me diplomë master ose me titull doktori të shkencave. Po ashtu janë marrë në konsideratë edhe kushtet për hyrje dhe qëndrim të të huajve në shtetet përkatëse.

---