Shtetasi rus shpallet ‘Non Grata’ në Kosovë

Shtetasi rus i UNMIK-ut, Mikhail Krasnoshchenkov, është shpallur persona ‘Non Grata’ nga autoritetet e Kosovës.

Kryeministri i Kosovës, Ramush Haradinaj e ka bërë këtë gjë të ditur përmes një postimi në Facebook, ku ka kërkuar që menjëherë të respektohet ky vendim që është marrë nga Kosova.

“Sot, kam kërkuar nga Ministria e Punëve të Jashtme që në bazë të kompetencave kushtetuese dhe ligjore të shpallim shtetasin rus z.Mikhail Krasnoshchenkov si person ‘Non Grata’.

Vendimi është marrë sot ndaj këtij personi që punon si staf ndërkombëtar në Kombet e Bashkuara, dhe të njëjtit i urdhërohet që ta lëshojë territorin e Republikës së Kosovës. Ky vendim ka hyrë në fuqi, sot nga 31 maj 2019.

I bëj thirrje Përfaqësuesit të Posaçëm të Sekretarit të Përgjithshëm të Kombeve të Bashkuara në Kosovë të respektojë vendimin”, ka shkruar Haradinaj në rrjetet sociale, përcjell albinfo.ch.

“Vendimi është marrë për shkak të veprimeve të shtetasit rus kundër rendit kushtetues të Kosovës, vlerave universale, paqes dhe stabilitetit”, ka shkruar tutje Haradinaj.

Krasnoshchenkov është arrestuar ditën kur Policia e Kosovës realizoi aksion në pjesën veriore të vendit. Ai u arrestua pasi bllokoi rrugën duke penguar policinë të kryenin punën e tyre.