Një punëtor humb jetën në aksidentin e teleferikut në Titlis

Keystone

Në aksidentin  e rëndë të punës që ndodhi sot në një teleferik në pikën turistike Titlis ka humbur jetën një punëtor. Siç bën të ditur policia, gjithsej gjashtë persona kanë pësuar lëndime nga ky aksident i cili ndodhi gjatë punimeve për kontrollimin teknik të teleferikut.

Shefi i ndërmarrjes “Titlis-Bahnen” që menaxhon këtë qendër teleferikësh ka thënë për Agjencinë e Lajmeve Keystone-SDA se të aksidentuarit nuk janë turistë por punëtorë të ndërmarrjes në fjalë. Ai ka theksuar se mungojnë informacionet shtesë, të cilat mund të pasojnë më vonë, transmeton albinfo.ch.

Sipas mediave të ndryshme, në vendin e aksidentit janë angazhuar edhe disa helikopterë shpëtimi.

Aksidenti ka ndodhur në Gerschnialp, që është sipër pikës turistike Engelberg në Zvicrën qendrore. Shkaktare e aksidentit thuhet të ketë qenë përpjekja për prerjen e një kablloje të teleferikut.