Në Kosovë, për 5 muaj, 35 viktima të trafikut rrugor

1924 aksidente me lëndime trupore, në të cilat kanë pësuar 3569 persona dhe 3264 aksidente me dëme materiale

Gjatë pesë muajve të deritashëm të këtij viti (janar-maj 2019), në Kosovë, në aksidente të rënda trafiku në cilësinë e shoferëve, pasagjerëve dhe këmbësorëve kanë vdekur 35 persona. Nga 5217 aksidente sa ndodhën në total gjatë kësaj kohe, janë lënduar 3569 persona, raporton Gazeta Express.

Sa u përket aksidenteve me fatalitet, ka më pak viktima këtë vit krahasuar me pesëmujorin e parë të 2018-ës. Vjet për pesë muaj vdiqën në komunikacion 42 persona, këtë vit 35, apo 7 më pak, tha policia në statistikat dhënë Gazetës Express.

Për shkelësit e rregullave të komunikacionit policia ka shqiptuar mbi 170 300 tiketa trafiku.

Në statistikat e Policisë së Kosovë bëhet e ditur se gjatë periudhës janar-maj 2019 kanë ndodhur 29 aksidente fatale, në të cilat jetën e kanë humbur 35 persona. 1924 aksidente me lëndime, në të cilat lëndime trupore kanë pësuar 3569 persona dhe 3264 aksidente me dëme materiale. “Në total kanë ndodhur 5217 aksidente”.

---