Ulet shkalla e papunësisë në Zvicër: 2.3% të papunë në maj

në fund të majit, në qendrat regjionale për ndërmjetësim të punës (RAV) kanë qenë të regjistruar 101.370 persona si të papunë. Ky numër është për 8000 më i vogël se ai i majit të vitit 2018

Në muajin maj 2019 në Zvicër ka pasur më pak njerëz të papunë në krahasim me majin e vitit 2018. Shkalla e papunësisë ka pësuar një zbritje prej 0.1%, në krahasim një vit më parë. Ajo në fund të majit ka qenë 2.3%, ndërsa një muaj më parë ka qenë 2.4%, bën të ditur Sekretariati Shtetëror për Ekonomi, Seco, shkruan srf.ch.

Kështu, në fund të majit kanë qenë të regjistruar 5.5% më pak persona si të papunë në krahasim me muajin paraprak dhe 7.3% më pak në krahasimm me majin e vitit 2018.

Si numër, në fund të majit, në qendrat regjionale për ndërmjetësim të punës (RAV) kanë qenë të regjistruar 101.370 persona si të papunë, transmeton albinfo.ch. Ky numër është për 8000 më i vogël se ai i majit të vitit 2018.

Edhe te kategoria e të rinjve, në maj 2019 është shënuar një rënie e numrit të papunëve. Kështu, në fund të majit në qendrat e përmendura kanë qenë të regjistruar 10.049 persona të moshave 15 deri 24 vjeçare, transmeton albinfo.ch. Kjo tregon një rënie për 0.1% në krahasim me një vit më parë ose një shkallë prej 1.8%.

Te kategoria e njerëzve mbi 50 vjeçarë në fund të majit të këtij viti kanë qenë të regjistruar si të papunë gjithsej 30.000 veta, që domethënë se 2.2% të tyre kanë qenë të regjistruar si të papunë. Ata përbëjnë 29% të numrit të përgjithshëm të të papunëve.

---