KFOR-i ka shënuar 20-vjetorin e hyrjes në Kosovë

Shënohet 20-vjetori i hyrjes në Kosovë. Me këtë rast Komandanti i KFOR-it në Kosovë, Lorenzo D’Addario, ka kujtuar kohën e luftës. 

“Kur mendoj Prishtinën e vitit 1999, më kujtohet ndjenja e dëshpërimit dhe frikës, por edhe ndjenja që më e keqja kishte mbaruar pas atyre muajve shkatrrimtarë të luftës civile . Shumë njerëz ishin zhvendosur, kishte mungesë të sigurisë dhe shërbimeve themelore”, ka thënë D’Addario. 

Komandanti gjithashtu ka thënë se KFOR-i ka krijuar siguri për të gjithë. 

“KFOR-i ka ofruar siguri dhe liri të lëvizjes për të gjithë, duke mundësuar krijimin e kushteve për rifillimin e shërbimeve, jetës politike dhe civile, duke punuar së bashku me organizatat dhe misionet e tjera ndërkombëtare në cilësinë tonë”, ka shtuar komandanti, përcjell albinfo.ch. 

Sipas tij, Kosova është vend shumë më ndryshe se 20 vjet më parë. 

“Ka ende shumë për të arritur. Megjithatë, zhvillimet aktuale në Ballkan shënojnë rrugëtimin drejt përparimit dhe integrimit që mund ta përcjellim. Pajtimi me të kaluarën kërkon guxim për kompromis që mund të vie vetëm me vizion dhe përkushtim ndaj njerëzve”, ka thënë komandanti.