Ky është vendi më paqësor në botë

Në kontinentin evropian, në krye të renditjes si vendet më të paqta janë Islanda, Portugalia, Austria, Danimarka dhe Sllovenia

Paqja në botë është përmirësuar për të parën herë në pesë vite, por sidoqoftë planeti është më pak paqësor se një dekadë më parë.

Indeksi global i paqes ka zbuluar se shumë nga konfliktet e 10 viteve të shkuara, kanë nisur të shuhen. Por pavarësisht ndryshimeve pozitive, tensione të reja të brendshme dhe ndërkombëtare janë ndezur.

Islanda, është e pa sfiduar, vendi më paqësor në botë, një titull që e mban që nga 2008. Ajo ndiqet nga Zelanda e Re dhe Portugalia, një hyrje e re në krye të klasifikimit, transmeton TCH.

Në fund të listës, Afganistani zëvendëson Sirinë si vendi më pak paqësor në botë. Siria është tani vendi i dytë më pak paqësor i ndjekur nga Sudani jugor dhe Jemeni, përcjell albinfo.ch.

Raporti i përvitshëm, për llogari të institutit për ekonominë dhe paqen, ndalet tek faktorë si militarizimi, konflikti dhe lidershipi si edhe faktorë të tjerë në 163 vende të botës, përfshirë edhe Shqipërinë që renditet e 51-ta, në mesin e klasifikimit, një vend pas Serbisë.

Duke u përqendruar në kontinentin evropian, në krye të renditjes si vendet më të paqta janë Islanda, Portugalia, Austria, Danimarka dhe Sllovenia.

Ndërsa në dhjetëshen e fundit të klasifikimit ndodhen Maqedonia e Veriut, Mali i Zi, Moldavia, Bosnje-Hercegovina, Kosova, Bjellorusia etj, me Rusinë që konsiderohet si vendi më pak paqësor në Evropë.

 

---