Rexhbeçaj nuk është i dëshpëruar që nuk e ftoi Gjermania

Foto: Facebook

Elvis Rexhbeçaj ka shpresuar se do të ftohet nga Gjermania për kampionatin evropian të Shpresave që aktualisht është duke u mbajtur në Itali dhe San Marino.

Por trajneri Stefan Kuntz nuk e ka ftuar Rexhbeçajn, ndërsa ky fakt nuk e ka dëshpëruar lojtarin e Wolfsburgut. Kështu ka shkruar të mërkurën sajti “sportbuzzer.de”, transmeton Koha Ditore, përcjell Albinfo.ch.

“Synimi im gjithnjë ishte që t’ia dilja te Wolfsburgu. Për këtë mendoj se tashmë kam arritur diçka të madhe. Fjalët për përfaqësuese më shumë kanë ardhur nga shokët e mi, që kanë thënë se unë duhet të shkoj atje. Unë i kam shumë borxh vendit, kështu që nuk jam i dëshpëruar”, ka thënë Rexhbeçaj.

Ai ka lënë të kuptohet se do të luajë për Gjermaninë nëse merr ftesë.

Ka shpresë që Rexhbeçaj mund të vendosë për Kosovën. Mesfushori 21-vjeçar nuk ka luajtur ende për ndonjë përfaqësuese dhe mund të vendosë.

“Nëse ndodh që të luaj për Gjermaninë, do të ishte e shkëlqyeshme. Është ëndërr e secilit”, ka thënë Rexhbeçaj që ka kontribuar me dy gola e dy asistime në 24 paraqitje në Bundesligë.

Ai nuk i frikësohet konkurrencës për edicionin e ri.

“Nuk jam frikësuar asnjëherë, pavarësisht kush ka ardhur. Ka të bëjë me performancën. Tash po shikoj para edhe drejt ndeshjeve evropiane me skuadrën”, u shpreh ai.