Nisin negociatat për njohjen e pensioneve

Qeveria e Shqipërisë dhe ajo e Gjermanisë kanë nisur bisedimet për njohjen e pensioneve për rreth 20 mijë emigrantë shqiptarë që jetojnë dhe punojnë në Gjermani

Autoritetet shqiptare dhe ato gjermane kanë nisur negociatat për njohjen e pensioneve për rreth 20 mijë emigrantë shqiptarë që jetojnë dhe punojnë në Gjermani. Kërkesa për pensionet është parashtruar nga ministri i Mirëqenies Sociale dhe Rinisë, Erion Veliaj, i cili po zhvillon një vizitë në Berlin.

Ministri shqiptar është pritur në Berlin nga homologia gjermane, ministrja e Punës dhe Çështjeve Sociale, Andrea Nahles, ndërsa në fokusua të takimit ishte njohja e pensioneve të emigrantëve shqiptarë në Gjermani.

Po ashtu siç raportojnë mediet në Tiranë, dy ministrat kanë diskutuar për mundësinë e nënshkrimit të një marrëveshjeje të re në fushën e punësimit, si dhe shkëmbimit të eksperiencës dhe ndihmës teknike gjermane në fushën e arsimit profesional, punësimit dhe shërbimeve sociale.

Ministri Veliaj tha se nënshkrimi i marrëveshjeve me vendet anëtare të Bashkimit Evropian për njohjen e pensioneve të emigrantëve shqiptarë, është një nga përparësitë e qeverisë në Tiranë, dhe i kërkoi Nahles hapjen e procesit të negocimit të një marrëveshjeje të tillë edhe me Gjermaninë.

Nga ana e saj, ministrja Nahles mirëpriti kërkesën e ministrit Veliaj dhe shprehu mbështetjen e saj maksimale për ngritjen e një grupi pune në nivel teknik për njohjen e pensioneve të emigrantëve shqiptarë dhe anasjelltas.

Ajo shtoi se është një mbështetëse e fortë për eksplorimin e të gjitha fushave të bashkëpunimit me vendet aplikante në Bashkimin Evropian, duke theksuar punësimin në fushën e infermierisë dhe ndihmën që mund të japë Gjermania për zhvillimin e arsimit profesional në Shqipëri.

Gjatë vizitës në Gjermani, ministri Veliaj do të nënshkruajë në Hamburg një marrëveshje në fushën e arsimit profesional.