Mbeturinat kthehen në energji elektrike

Brenda tre muajve në Mitrovicë do të ndërtohet një fabrikë në vlerë 54 milionë dollarësh, investim amerikano-suedez, për riciklimin e mbeturinave në energji elektrike

Një konzorcium amerikan-suedez është i gatshëm të investojë në rajonin e Mitrovicë në Kosovë, rreth 54 milionë dollarë amerikan në ndërtimin e një fabrike për riciklimin e mbeturinave dhe shndërrimin e tyre në energji elektrike. Ky projekt i cili ka marrë mbështetje edhe nga strukturat komunale, pritet të fillojë ndërtimin gjatë këtij muaji.  

Drejtori i kompanisë amerikane-suedeze, Lars Ake Karlsson, tha se e ka të gatshëm projektin i cili kushton 54 milionë dollarë, ndërsa për ndërtimin e kapaciteteve në Mitrovicë, ai tha se do të prodhohen 12 megavate energji elektrike.

“E kemi të gatshëm projektin dhe jemi përgatitur për implementimin e parakontratës për ndërtimin e kapaciteteve për prodhimin e 12 megavate energji elektrike nga mbeturinat e rajonit të Mitrovicës. Kemi ardhur këtu për ta regjistruar kompaninë dhe për të filluar menjëherë ndërtimin e kapaciteteve”, tha Karlsson citon “Zëri”.

Ai tha se punimet do të përfundojnë brenda tre muajve,

Në anën tjetër, kryetari i Mitrovicës, Agim Bahtiri, tha se komuna do ta ndihmojë maksimalisht kompaninë APG që të regjistrohet dhe që të kryejë të gjitha procedurat e nevojshme për fillimin e punimeve.

“Komuna do të ndihmojë për të kryer procedurat e regjistrimit dhe të dhënies së lejeve të nevojshme. Ky është një investim shumë i rëndësishëm që do të ndikojë në zhvillimin e komunës. Me rrymën që do të prodhohet në këto kapacitete do të furnizohen 380 bizneset në Zonën e Lirë Ekonomike, si dhe uji i ngrohtë që do të lirohet, do të mundë të përdoret për ngrohjen e serrave me prodhime të ndryshme gjatë gjithë vitit”,  tha Bahtiri.

Procedurat për regjistrimin e kompanisë, sipas Bahtirit, do të përfundojnë brenda dy ditëve.

Ndryshe, fabrika do të ndërtohet në Frashër, ndërsa e mira e gjithë kësaj, sipas banorëve është se mbeturinat e gjithë komunës së Mitrovicës, për edhe komunave për rreth, do të shfrytëzohen nga kjo fabrikë. Përveç që nxjerr energji elektrike, ajo e pastron Kosovën nga mbeturinat.