Ky është identiteti i alpinistit nga Maqedonia që humbi jetën në Olimp

Foto Ilustrim

Alpinisti nga Maqedonia e Veriut që humbi jetën gjatë ditës së djeshme në malin Olimp në Greqi ishte Mefail Guri nga Shkupi, i lindur në vitin 1962.

Lajmin për vdekjen e Gurit është konfirmuar nga Ministria e Punëve të Jashtme si dhe nga SHBE “Shkupi”.

“Ditën e djeshme një pjesë e anëtarëve të SHBE “Shkupi” udhëtuam në Greqi për t’u ngjitur në malin e Olimpit. Rreth orës 20:00 arritëm 50 metra në afërsi të shtëpisë malore “Refugge A” dhe për një moment anëtari dhe vëllai ynë, Mefail Guri, u ndal, u mbështet mbi shkopinj dhe ra pa vetëdije, duke u rrokullisur rreth 10 m. Pasi që ishte pa vetëdije, as nuk fliste, e as nuk dinte të mbahej, ne vrapuam duke i dhënë ndihmën e parë, në afat prej 2 minutash kanë arritur edhe persona zyrtarë nga shtëpia malore për dhënien e ndihmës së parë, të cilët dhanë maksimumin e tyre, provuan edhe me elektroshok ta kthejnë në jetë, por për fat të keq nuk arritën”, thonë nga Shoqata Bjeshkatare Ekologjike “Shkupi”.

Shkaku i vdekjes pritet të mësohet nesër pas kryerjes së autopsisë në Selanik, ndërsa sipas informatave fillestare, ka të ngjarë që alpinisti Guri të ketë pësuar sulm në zemër, përcjell albinfo.ch.