Votuesit nga diaspora ankohen se u janë shkelur të drejta

Ekspozimi i datave të lindjes së votuesve konsiderohet e panevojshme dhe për këtë çështje janë duke pritur sqarim nga KQZ-ja

Madje gurbetqarët për këtë kanë bërë ankesë në Agjencinë Shtetërore për Mbrojtjen e të Dhënave Personale.

Sipas drejtorit të kësaj agjencie, Bujar Sadiku, ka pasur ankesa prej votuesve jashtë vendit, të cilët pretendojnë se u janë shkelur të drejtat duke iu publikuar të dhënat personale.

Bujar Sadiku, drejtor i Agjencisë Shtetërore për Mbrojtjen e të Dhënave Personale:

“Ankesa së fundmi herë kemi pasur sa i përket listës së hapur të votuesve jashtë vendit të Kosovës, ku ka qenë edhe data e lindjes dhe sinqerisht për këtë është vlerësuar që është tejkaluar qëllimi, sepse numri i regjistrimit është faktor i rëndësishëm dhe emri dhe mbiemri i bollshëm për verifikimin e kësaj liste të votuesve jashtë vendit, kështu data e lindjes ka qenë e tepërt dhe e panevojshme të publikohet dhe ne kemi dhënë opinionin tonë që largohet data e lindjes dhe sipas ekspertizave tona mund të ketë edhe dy persona me emër, mbiemër dhe datë të lindjes së njëjtë”.

Ai tha se ka qenë e tepërt ekspozimi i datave të lindjes së votuesve dhe se për këtë çështje janë duke pritur sqarim nga KQZ-ja.

Bujar Sadiku, drejtor i Agjencisë Shtetërore për Mbrojtjen e të Dhënave Personale:

“Ne kemi ftuar KQZ-në dhe po presim të takohemi me ta dhe ta shqyrtojmë deri në fund këtë çështje”.

I pari i kësaj Agjencie tha se në të kaluarën ka pasur shumë ankesa për qasjen në të dhënat personale nga bankat në Kosovë, të cilat kanë krijuar kartela pa pëlqimin paraprak apo qytetarët janë thirrur për oferta marketingu.

Sipas tij, ky problem tashmë nuk ekziston, sepse bankat kanë filluar certifikimin e zyrtarëve të mbrojtjes së të dhënave sipas rregullores së re të Bashkimit Evropian.

 

 

 

 

 

 

---