Thaçi e fton Kurtin në takim në ditën e fundit të 2019-ës

Edhe pse u refuzua dy herë, presidenti Hashim Thaçi e ka ftuar sërish kryetarin e Lëvizjes Vetëvendosje, Albin Kurti, në takim konsultativ për caktimin e mandatarit për formimin e qeverisë, shkruajnë mediat atje, përcjell albinfo.ch.

I pari i vendit ka thënë se duke e mirëkuptuar pamundësinë e pjesëmarrjes së Kurtit për dy takimet paraprake, e fton atë që të takohen nesër, ditën e fundit të vitit 2019, në orën 10:00. ”Me qëllim të funksionalizmit sa më të shpejtë të institucioneve të Republikës së Kosovës, si President i Republikës së Kosovës do t’i ndërmarr të gjithë hapat e përcaktuar në Kushtetutë”.

“Andaj, me qëllim të konsultimit për të propozuar kandidatin për Kryeministër për formimin e Qeverisë së Republikës së Kosovës, ju ftoj sërish për takim konsultativ më 31 dhjetor 2019, në orën 10:0, në Kabinetin e Presidentit të Republikës së Kosovës”, ka shkruar i pari i vendit në letrën e tretë dërguar Kurtit.