Spitali në Wuhan njofton vdekjen edhe të mjekut që u prek nga koronavirusi

Mjeku kinez, Li, u akuzua për përhapje paniku dhe lajmesh muaj më parë, kur ai u tregoi mediave se në Kinë është duke u përhapur një virus ku do të ketë përmasa të mëdha. Pas kësaj, policia e arrestoi shkaku i përhapjes së panikut, që autoritetet kineze i quajtën të rreme. Pak muaj më vonë doli që daklaratat e këtij mjeku ishin të vërteta, fatkeqësisht edhe ai ishte prekur nga virusi kinez dhe ka humbur jetën.

Është bërë e ditur nga media shtetërore e Kinës se mjeku 34-vjeçar në spitalin e Wuhan ka ndërruar jetë nga koronavirusi.

Spitali ku ishte shtruar ai fillimisht bëri me dije se 34-vjeçari Li Wenliang ishte në gjendje kritike, por gjallë, duke përgënjeshtruar mediat.

Tani, spitali ka bërë të ditur se mjeku, fakteqësisht, ka vdekur.

“Në luftë me koronavirusin, doktori i spitalit tonë fatkeqësisht u infektua. Aktualisht është në gjendje kritike dhe po bëjmë më të mirën tonë për ta shëruar”, thuhej në njoftimin fillestar të spitalit.

Disa media kineze, përfshirë gazetën e Partisë Komuniste në pushtet, kishin publikuar se doktori kishte ndërruar jetë, përpara se të fshinin postimet.

Li kishte dhënë alarmin për koronavirusin në muajin dhjetor, duke postuar në grupin e studentëve të tij në aplikacionin e mesazheve “WeChat” se 7 persona ishin diagnostikuar me një sëmundje të ngjashme me SARS-in dhe ishin vendosur në karantinë në spitalin e Wuhanit.

Disa ditë pas këtij mesazhi, Li u akuzua për përhapje paniku dhe lajmesh të rreme nga policia.

---