Stuhia “Ciara” ka përfshirë Britaninë

Shërbimi i Motit në Britani ka lëshuar një paralajmërim për shkak se erërat kanë arritur shpejtësinë deri në 130 kilometra në orë

Erërat dhe valët e fuqishme kanë goditur Britaninë e Madhe, derisa stuhia ‘Ciara’ ka shkatërruar çdo gjë që i ka dalë përpara.

Stuhia Kiera (Ciara) ka përfshirë Mbretërinë e Bashkuar, me erëra të forta dhe shira të dendura, që kanë shkaktuar probleme në transport.

Në shumë zona ka pasur përmbytje dhe autoritetet kanë dhënë alarmin “rrezik për jetën” në lokalitetet Patelej Brixh dhe Jorkshajër.

Po ashtu, thuhet se linjat ajrore kanë anuluar shumë fluturime, ndërsa kompanitë që menaxhojnë hekurudhat u kanë bërë thirrje njerëzve që të shmangin udhëtimet.

Pasagjerët e trageteve janë përballur gjithashtu me vonesa dhe anulime, ndërsa drejtuesve të automjeteve u është bërë thirrje për kujdes maksimal.

Një paralajmërim për erëra të forta është në fuqi në disa zona të Britanisë së Madhe, ku erërat e deritanishme kanë arritur deri në 129 km në orë.

Ndërkohë eventet sportive janë anuluar për shkak të motit, përfshirë ndeshjen e Premier Ligës, Mancester Siti – Uest Hem.

Aeroporti i Hithrout ka bërë me dije se ka marrë masa me partnerët e linjave ajrore për të operuar me shërbim të kufizuar dhe të njëjtën gjë kanë bërë edhe aeroporte të tjera.

Stuhia ka prekur edhe vende të tjera të Evropës, si Belgjikën dhe Holandën.

Rreth 120 fluturime nga aeroporti Shiphol i Amsterdamit u anuluan për shkak të erërave.

 

---