Thaçi deklarohet pas takimit në Mynih

Keystone (AP Photo/Visar Kryeziu)

Presidenti i Kosovës, Hashim Thaçi, është deklaruar për media pas takimit në Konferencën e Sigurisë në Mynih, ku në panel ishte përfaqësuesi i Politikës së Jashtme të BE-së, Josep Borell.

Ai ka treguar se në këtë takim ka shpalosur të arriturat e Kosovës dhe se ka kërkuar që kjo qasje e BE-së sa u përket vizave karshi Kosovës të ndryshojë.

“Ishte një mundësi shumë e mirë që të prezantohen të arriturat e Kosovës. Biseduam për hapat e mëtutjeshme që duhet të ndërmerren. Kosova është e zhgënjyer nga BE-ja për shkak të mosliberalizimit të vizave. Kërkova që kjo qasje të ndryshojë. Nuk po kërkojmë ndonjë dhuratë. Është një qasje tërësisht e padrejtë ndaj qytetarëve të vendit”, tha fillimisht presidenti  i Kosovës.

Tutje, Thaçi foli për dialogun Kosovë-Serbi dhe tha se ky dialog duhet të përmbyllet me njohje. Në fund, presidenti theksoi se duhet të ketë vullnet të mirë nga të dy vendet që marrëveshja finale Kosovë-Serbi të arrihet në fund të këtij viti.