Zvicër: 12 % më shumë kërkesa të azilit gjatë janarit

Vendet kryesore të origjinës të azilkërkuesve në Zvicër në janar ishin: Eritrea me 193 aplikime (9 më shumë sesa në dhjetor), Afganistani (136 aplikime; +35), Turqia (129 aplikime; +18) etj.

Në janar të vitit 2020, në Zvicër janë bërë 1,244 kërkesa për azil. Kjo shifër korrespondon me një rritje prej 11.9 për qind (+133 aplikime) në krahasim me muajin e kaluar (dhjetor 2019) dhe 7.9 për qind (+91 aplikime) në krahasim me janarin 2019.

Në janar, SEM (Sekretariati Shtetëror për Migracion) ka përpunuar në instancën e parë 1712 aplikime për azil, thuhet në një komunikatë për shtyp të SEM. Në këtë kontekst janë marrë 257 vendime për mos hyrje (203 prej të cilave bazoheshin në Marrëveshjen e Dublinit), 462 personave u është dhënë azili dhe 541 janë pranuar përkohësisht, transmeton albinfo.ch. Numri i çështjeve në pritje ka qenë për 365 më i vogël në krahasim me muajin paraprak duke rënë në 8012 si numër i përgjithshëm.

Në janar, 412 persona janë larguar nga Zvicra në mënyrë të kontrolluar ose janë kthyer. Zvicra i ka kërkuar një vendi tjetër të Dublinit që të marrë në dorëzim 446 persona, ndërsa 126 njerëz janë transferuar në vendin kompetent sipas marrëveshjes së Dublinit, përcjell albinfo.ch. Në të njëjtën kohë, vendet e tjera të Dublinit i kanë kërkuar Zvicrës të marrë mbi 464 persona, ndërsa Zvicra ka pranuar vetëm 91 prej tyre.

Vendet kryesore të origjinës të azilkërkuesve në Zvicër në janar ishin: Eritrea me 193 aplikime (9 më shumë sesa në dhjetor), Afganistani (136 aplikime; +35), Turqia (129 aplikime; +18), Siria (99 aplikime; -4) dhe Algjeria (93 kërkesa; +21).

---