Pas mbylljes së shkollave, në Zvicër do të praktikohet mësimi online

Të gjitha shkollat, universitetet dhe objektet e formimit profesional në Zvicër sot u mbyllen nga (16 mars deri në 4 prill)

Këshilli Federal i Zvicrës ditë më parë njoftoi se të gjitha shkollat ​​do të mbyllen për tre javë deri në 4 prill dhe në disa kantone deri më 30 prill, transmeton albinfo.ch.

Kantonet e Fribourg, Neuchatel, Valais dhe Vaud zgjatën ndalimin e mësimit në shkolla deri më 30 Prill.

Ndalimi nuk vlen për çerdhe – ku kantonet individuale janë përgjegjëse për marrjen e një vendimi.

Mirëpo autoritetet arsimore zvicerane njoftuan se mësimi do të zhvillohet online, pra nga shtëpia.

Nxënësve u janë vënë në dispozicion platforma digjitale mësimdhënëse, ndërsa do të krijohen edhe grupe të përbashkëta mes nxënësve dhe stafit pedagogjik, ku do të vendoset një orar mësimi, duke mos humbur mësimet e parapara. /Albinfo.ch.

---