Qeveria Federale lejon mbylljen e kantiereve dhe fabrikave në Tiçino

Qeveria Federale ka ndryshuar një urdhëresë, duke e shpallur të ligjshëm vendimin e kantonit jugor të vendit dhe kështu ka zgjidhur konfliktin

Siç është njoftuar tashmë, Kantoni i Ticinos ka mbyllur kantieret e ndërtimit dhe ndërmarrjet industriale javën e kaluar, duke shkelur kështu ligjin federal. Por tani Këshilli Federal ka legalizuar këtë hap me një “Lex Ticino”, u tha në konfefrencën pe¨r media që u mbajt pak më parë në Bernë, me pjesëmarrjen  e disa ministrave të Qeverisë Federale.

Qeveria Federale pra ka ndryshuar një urdhëresë, duke e shpallur të ligjshëm vendimin e kantonit jugor të vendit dhe kështu ka zgjidhur konfliktin.

Kantoni i Ticinos është më i prekuri nga koronavirusi në Zvicër, shkruan albinfo.ch. Bëhet fjalë për një mesatare trefish më të latë në krahasim me pjesën tjetër të Zvicrës, ka thënë ministri Alain Berset në konferencën e posapërfunduar për shtyp në Bernë.

Prandaj, Këshilli Federal ka vendosur që për këtë kanton të fusë në fuqi një urdhëresë që bën përjashtim në raport me gjithë vendin: në kushte të caktuara, kantonet tani mund të kufizojnë ose ndërpresin në tërësi funksionimin  e sektorëve të caktuar ekonomikë.

Kriteret janë shumë të rrepta: Duhet të ekzistojë një rrezik i veçantë për shëndetin e popullatës, siç është pandemia aktuale e koronavirusit, përcjell albinfo.ch. Prandaj është e qartë për Këshillin Federal se vetëm Ticino aktualisht plotëson të gjitha kushtet për të zbatuar përjashtimin në fjalë.

 

 

---