Shkon në 285 numri i të prekurve me koronavirus në Maqedoni

Autoritetet e Maqedonisë së Veriut kanë konfirmuar edhe 26 raste të reja me koronavirus në 24 orët e fundit, ndërsa është shënuar edhe një rast vdekjeje.

Bëhet fjalë për një 79-vjeçar nga Dibra që po trajtohej në Klinikën Infektive në Shkup.

Pacienti, tashmë i ndjerë, ishte diagnostikuar me Covid-19 më 23 mars, kurse pas përkeqësimit të gjendjes ishte shtruar në Klinikën Infektive në Shkup më 25 mars.

Gjatë ditës së sotshme edhe 9 pacientë të tjerë janë shëruar nga Covid-19 (8 nga Dibra dhe 1 nga Shkupi).

Pacientët janë lëshuar për kurim shtëpiak, pasi kanë rezultuar negativ në dy teste të koronavirusit.

Numri i përgjithshëm i të prekurve me Covid-19 deri në orën 12:00 në Maqedoninë Veriore shkon në 285, prej të cilëve 12 janë shëruar, kurse 7 kanë përfunduar me fatalitet.

---