Kina i frikësohet një vale të dytë të koronavirusit, 108 raste të reja

Tashmë zyrtarët në Kinë frikësohen për një valë të dytë infeksionesh të sjella nga jashtë vendit.

Së fundi, Komisioni Kombëtar i Shëndetësisë në Kinë ka njoftuar për 108 raste të reja me koronavirus. Ky është numri më i lartë i të infektuarve për të paktën një muaj.

Shumica e infeksioneve janë importuar, pasi 98 raste janë konfirmuar se e kanë sjellë virusin nga jashtë. Por janë të paktën 10 raste lokale.

Pavarësisht se është epiqendra origjinale e pandemisë, Kina ka pasur një ulje drastike të rasteve muajin e kaluar. Kjo bëri që shteti të lehtësojë paksa masat e karantinës.

Mirëpo tashmë zyrtarët frikësohen për një valë të dytë infeksionesh të sjella nga jashtë vendit. Numri total i rasteve të raportuara me koronavirus në Kinë është 82 160. Deri më tani atje kanë humbur jetën 3 341 persona, përcjell albinfo.ch.

---