Londër, vaksina kundër koronavirusit pritet të testohet ditët në vijim

Testimet klinike do të fillojnë brenda ditëve të ardhshme.

Është bërë e ditur se shkencëtarët në Britani të Madhe që po punojnë për zbulimin e një vaksine kundër koronavirusit, shpresojnë të fillojnë provat klinike deri në fund të javës tjetër, raporton BBC.

Sipas Sarah Gilbert, profesoreshë në Universitetin e Oksfordit, në deklarimet e saj thuhet se askush nuk është imunizuar deri më tani, por ekipit të saj iu dha leja të fillonin rekrutimin e vullnetarëve.

Ajo shpreson se testimet klinike do të fillojnë brenda ditëve të ardhshme.

“Ne jemi duke pritur të bëhen testet përfundimtare të sigurisë dhe të jepen miratimet përfundimtare”, i tha ajo BBC-së.

Gilbert shtoi se studiuesve iu duhet mbështetje nga qeveria e Mbretërisë së Bashkuar për përshpejtimin e prodhimit të vaksinës.

Britania e Madhe ka 115,314 të infektuar me koronavirusin e ri dhe 15,498 të vdekur, përcjell albinfo.ch.

---