Ministria: Rregullat vlejnë për të gjithë, Pacolli nuk i shpëton karantimit

Ministria e Shëndetësisë e Kosovës ka lëshuar një reagim sa i përket situatës së krijuar me kryetarin e AKR-së, Behgjet Pacolli i cili tha se qeveria e Kurtit është duke vepruar në formë diktatoriale me moslejimin e kryerjes së detyrës së deputetit, e po ashtu anulimin siç tha ai të aterimit në aeroportin e Prishtinës.

Në këtë reagim, MSH tha se në këtë ministri nuk ka arritur asnjë kërkesë zyrtare nga ato që ka përmendur Pacolli.

Sipas MSH-së, për të gjithë qytetarët e Kosovës do të aplikohen masat e njëjta ta karantinës, pavarësisht pozicionit që ata kryejnë.

“Po ashtu, nuk jemi të njoftuar me asnjë praktikë nga vendet e përparuara ku dikush për shkak të pozitës nuk i nënshtrohet kritereve të parandalimit të përhapjes së pandemisë”, thuhet në reagimin e MSH-së.

Njoftimi i plotë:

Nga mediat u njoftuam me ankesat e Kryetarit të AKR dhe njëherësh deputetit të Republikës së Kosovës, z. Behgjet Pacolli. Deri më sot në Ministrinë e Shëndetësisë nuk ka mbërritur asnjë kërkesë zyrtare për asnjë nga ato çka përmenden në reagimin e z. Pacolli.

Siç kemi konfirmuar ditën e djeshme për rastet e kthimit të shtetasve të Republikës së Kosovës aplikohen masat e njëjta. Pavarësisht pozicioneve që kanë qytetarët tanë përpara çështjeve të shëndetit publik trajtohen jo nga pozita por sipas kritereve të paracaktuara shëndetësore.

Po ashtu, nuk jemi të njoftuar me asnjë praktikë nga vendet e përparuara ku dikush për shkak të pozitës nuk i nënshtrohet kritereve të parandalimit të përhapjes së pandemisë.

Reagime të këtij lloji përçojmë mesazhe të gabuara tek qytetarët tanë të cilët po zbatojnë me korrektësi rekomandimet e institucioneve.

---