Publikohen libra dygjuhësh për fëmijët e diasporës

U publikuan libra dygjuhësh në ndihmë të fëmijëve të diasporës për të mësuar gjuhën shqipe.

Qendra e Botimeve për Diasporën ka bërë të ditur se këtë vit ka ardhur me një risi të librave për diasporën, në mënyrë që gjuha shqipe të mësohet më lehtë nga fëmijët shqiptarë nga diaspora, shkruan albinfo.ch.

Përrallat më të bukura klasike për fëmijë do të jenë në duart e fëmijëve të diasporës në një format ndryshe dhe mjaft interesant. Qendra e Botimeve për Diasporën, në një projekt ambicioz e mjaft të vlefshëm kushtuar përhapjes së gjuhës shqipe në Diasporë, sjell libra dygjuhësh në shqip e italisht, shqip e greqisht, shqip e anglisht etj.

Librat e përzgjedhur me kujdes, janë me ilustrime të bukura e tërheqëse, me një shqipërim mjeshtëror dhe të përshtatur për fëmijët e grupmoshës 5-8 vjeç.

“Hirushja” dhe “Pinoku” janë përrallat e para të kolanës me katërmbëdhjetë përralla në proces botimi.

Një mënyrë shumë tërheqëse për pasurimin e fjalorit dhe të shprehive në gjuhën shqipe te fëmijët, që nxit edhe më tepër tek ata interesin dhe dashurinë për gjuhën shqipe. /Albinfo.ch

 

---