50 raste të reja infeksioni me koronavirus në Zvicër

Dy vdekje janë regjistruar në gjithë Zvicrën brenda 24 orëve të fundit dhe 27100 veta deri më tani janë shëruar nga koronavirusi

Brenda një dite në Zvicër dhe Lihtenshtajn, janë raportuar 50 infeksione të reja me koronavirus. Ky numër është pak më i madh se ai i një dite më parë, kur sipas Zyrës Federale të Shëndetit Publik (BAG) ishin regjistruar vetëm 33 raste. Të martën kanë qenë 36 ndërsa të hënën, 39 raste të reja infekstimi brenda një dite.

Numri i vdekjeve si pasojë e sëmundjes së mushkërive Covid-19 në të gjitha kantonet, sipas agjencisë së lajmeve Keystone-SDA, të enjten pasdite mbërrinte në 1870. Dy vdekje janë regjistruar në gjithë Zvicrën brenda 24 orëve të fundit dhe 27100 veta deri më tani janë shëruar nga koronavirusi.

Keystone-SDA analizon të dhënat zyrtare të disponueshme në faqet e internetit të kantoneve dhe i përditëson ato dy herë në ditë, në mesditë dhe ne mbrëmje.

Nga ana tjetër, BAG jep një numër prej 1589 viktimash të shkaktuara deri më sot nga koronavirusi, transmeton albinfo.ch.

Kantoni jugor i vendit, Ticino, mund të marrë frymë më lirshëm: është dita e tretë këtë javë (me një ditë ndërprerje në mes), që në atë kanton nuk është shënuar asnjë vdekje e re nga Covid-19. Për më tepër, asnjë person tjetër nuk është testuar sot si pozitiv me virus.

Në fakt të hënën në Ticino, për herë të parë në dy muaj, nuk kishte vdekur asnjë person nga efektet e Covid-19 brenda 24 orësh, përcjell albinfo.ch. Po ashtu asnjë vdekje e re nuk u regjistrua as të martën. Por të mërkurën në  Ticino u raportua për një tjetër vdekje dhe tri infeksione të regjistruara rishtazi me virusin e koronës.

---