90% e zviceranëve duan të punojnë pjesërisht nga shtëpia

Vetëm 6 për qind kategorikisht refuzojnë të punojnë në shtëpi, qoftë edhe pjesërisht, pas pandemisë

Sipas një studimi të realizuar nga sindikata Syndicom, 90 për qind e punonjësve zviceranë duan që një pjesë të punës së rregullt ta kryejnë në shtëpi, si punë shtesë. Sindikata në fjalë ka porositur sondazhin nga instituti i kërkimeve gfs.bern, gjatë bllokimit të shkaktuar nga koronavirusi, shkruan srf.ch.

Sipas sondazhit, kënaqësia e punës në “shtëpinë zyrë” (Home Office) është më e madhe. Në këtë model pune, jeta private me atë profesionale mund të pajtohen më mirë pastaj zyra e shtëpisë është gjithashtu e mirë edhe për mbrojtjen e mjedisit, transmeton albinfo.ch.

Të 1126 të anketuarit kanë rezerva sa i përket mungesës së kontakteve joformale dhe izolimit, pastaj pajisjeve të vendit të punës në shtëpi dhe shpenzimeve të shkaktuara për “Home office”.

Kohën që ata kursejnë duke mos e bërë rrugën deri në vendin e punës, 78 për qind e të anketuarve e shfrytëzojnë për çështje private dhe 68 për qind për punë profesionale, përc jell albinfo.ch. 64 për qind besojnë se zyra e shtëpisë promovon ndjenjën e të qenit vetëm.

Megjithatë, vetëm 6 për qind kategorikisht refuzojnë të punojnë në shtëpi, qoftë edhe pjesërisht, pas pandemisë.

---