Gjermania do të investojë 500 milionë euro për trajnime të punëtorëve

Gjermania planifikon të investojë 500 milionë euro në përgatitjet e punëtorëve, për të tejkaluar pengesën që ndodhi shkaku i pandemisë.

Qeveria e kancelares Angela Merkel tashmë është pajtuar për dy pako stimuluese prej gjithsej 800 miliardë eurove për ta luftuar ndikimin negativ të izolimit nga koronavirusi në kohën kur vendi po përgatitet për recesionin më të rëndë që nga Lufta e Dytë Botërore.

“Ne duhet ta parandalojmë krizën e Covid-19 që të mos kthehet në krizë për të ardhmen profesionale të të rinjve dhe për sigurimin e punëtorëve të shkathët”, thuhet në një plan që pritet të miratohet nga kabineti i qeverisë gjermane të mërkurën e ardhshme.

Në këtë program përfshihet një bonus trajnimi deri në 3,000 euro për kompanitë e vogla dhe të mesme që janë goditur rëndë nga kriza, shkruan reuters, përcjell albinfo.ch.

---