A do të izolohet sërish Gjermania në dimër?

Keystone

Gjermania, e cila ditëve fundit ka shënuar rritje të të infektuarve me Covid 19, nuk planifikon të futet në një izolim tjetër gjatë dimrit, përkundër paralajmërimeve të ndryshme të ekspertëve për një valë të dytë të koronavirusit.

Një gjë të tillë e bëri të ditur ministri gjerman i Shëndetësisë, Jens Spahn, shkruan the Guardian, transmeton albinfo.ch.

Ky qëndrim i Berlinit zyrtar vjen edhe përkundër rritjeve të shifrave të të infektuarve ditët e fundit.

Vetëm në dy ditët e fundit në Gjermani u regjistruan nga rreth 1,200 raste të infektimeve për 24 orë. Të martën u shënuan katër viktima, ndërsa të mërkurën numri i të vdekurve për një ditë shkoi në 11.

Me gjithë rrirjen e rasteve të të infektuarve, Gjermania ka numër shumë më të vogël të viktimave të koronavirusit që nga fillimi i pandemisë në krahasim me shtetet e tjera, si Italia, Franca, Spanja e Britania e Madhe.