Kosovë: Kultura dhe arti në zi për vdekjen e Adem Mikullovcit

Vdekja e artistit të mirënjohur shqiptar, Adem Mikullovci, ka pikëlluar gjithë komunitetin artdashës. Në veçanti, të menjëhershme kanë qenë reagimet e komunitetit artistik të Kosovës në rrjetet sociale. Përmes fotove të ndryshme ata kanë kujtuar jetën dhe veprën e Mikullovcit.

Por kush ishte Adem Mikullovci? Në vijim po sjellim një biografi të jetës dhe veprës së tij:

Adem Mikullovci ka lindur në vitin 1939 në Vushtrri.

Pas ndërprerjes së studimeve në Akademinë për Teatër dhe Film në Beograd në vitin 1968 kthehet në Prishtinë dhe fillon punën në teatër. Prej atij viti e deri në korrik të vitit 1990, Adem Mikullovci bëri një karierë me 45 role kryesore si dhe rreth 70 role të dyta në shfaqje teatrore, përcjell albinfo.ch.

Rolet më të dalluara i realizoi në shfaqjet: “Duke pritur Godonë”,”Po shkoj për gjah”, “Njeriu që pa vdekjen me sy”, “Dashuria”, “Hotel Kashta” me rekord shikueshmërie (nganjëherë me nga dy shfaqje në ditë), “Fundi i botës”, “Miza në vesh”, “Erveheja” etj. Mikullovci gjithashtu ishte regjisor i disa shfaqjeve në teatër, si: “Pas vdekjes”(Çajupi), “Mosha e bardhë” (D. Agolli), “Dan Shejtani”, “Engjulli i stacionit”, monodrama “Bihorasit”(dramatizim i veprës së autorit Q.Sijariq), “Ti mos u përziej”, komedia “Shtrati”, stend up komedia “Përgjuesi” etj.

Ndryshe, i ndjeri Mikullovci 6 muaj më parë humbi miken e tij, aktoren e njohur Leze Qena, të cilës atëkohë i kushtoi vargje prekëse.