Skip to content

Reshje të reja bore në Alpe, rreziku nga ortekët arrin nivelin 4 në Valis

Foto nga arkiva: Keystone

Reshjet e dendura të borës dhe erërat e forta perëndimore kanë rritur rrezikun nga ortekët në disa zona të kantonit Valis. Autoritetet paralajmërojnë për kushte shumë kritike për aktivitetet në terrene malore.

Në disa pjesë të kantonit Valis në Zvicër është shpallur niveli 4 nga 5 i rrezikut nga ortekët, i cili do të mbetet në fuqi deri të premten në orën 17:00. Paralajmërimi vlen për zonat në veri dhe perëndim të Sionit, transmeton albinfo.ch.

Sipas Institutit për Studimin e Borës dhe Ortekëve (SLF), reshjet e reja të borës dhe erërat e forta perëndimore kanë krijuar kushte të rrezikshme në zonat malore. Edhe aktivitetet sportive dimërore mund të shkaktojnë shkëputjen e ortekëve.

Instituti i vlerëson kushtet për ekskursione dhe aktivitete në terrene malore si shumë kritike, duke u bërë thirrje sportistëve dhe vizitorëve të tregojnë kujdes të shtuar.

Ndërkohë, në disa pjesë të Alpeve, gjatë tri ditëve të ardhshme pritet të bien më shumë se një metër borë, çka mund ta rrisë edhe më tej rrezikun nga ortekët./Albinfo.ch