400 protestues marshojnë në Zug kundër masave të koronës

Shumica dërmuese e pjesëmarrësve në këtë protestë të lejuar kishin vënë maskat në fytyrë

Qindra njerëz kanë demonstruar të shtunën kundër masave të koronës në qytetin e Zugut. Ata kanë dalë në rrugë me kostume të bardha dhe me maska.

Më shumë se 400 njerëz kanë marrë pjesë në këtë aktivitet, ka raportuar një korrespondent i agjensisë së lajmeve Keystone-SDA.

Demonstruesit janë grumbulluar në stacionin e trenit në orët e para të pasdites dhe kanë marshuar në kolonë prej dy vetësh dhe në një distancë drejt Landsgemeindeplatz buzë liqenit.

Atje ishte planifikuar një tubim i aprovuar, ku do të mbaheshin edhe fjalime.

Marshimi i protestës ka nisur pa incidente, tranmseton albinfo.ch. Por, sipas policisë, kishte raste pengesash në trafik.

Shumica dërmuese e pjesëmarrësve kishin vënë maskat në fytyrë. Disa demonstrues mbanin pankarta, ku mund të lexoheshin slogane  si: “Stop testeve masive!”, “Hiqni maskat për të gjithë”, “Viruset janë në media” dhe “@RIP të drejtat themelore” etj.

Demonstrata u organizua nga shoqata “Stiller Protes” (Protesta e Heshtur). Kjo shoqat vihet kundër masave zyrtare kundër virusit korona.

---