Apel shqiptarëve të Maqedonisë në Austri: Regjistrohuni! A e keni harruar tokën tuaj?

Regjistrimi i popullsisë së Maqedonisë së Veriut po vazhdon me intensitet të lartë në Zvicër, Gjermani, Itali dhe në vende të tjera.

Numri i përgjithshëm, sipas Entit për Statistikë, deri më tani është  160.519 qytetarë.

Por ajo që bien në sy është se mërgimtarët nga Austria janë regjistruar në numër të vogël.

Faqja “Don’tYou20%me”, nëpërmes një statusi ka reaguar për të mobilizuar popullatën shqiptare që është në Austri të vetëregjistrohen.

“TAG Shqiptarët e Austrisë që janë në “gjumë” për regjistrimin! A e keni harruar tokën tuaj?”, thuhet në statusin e “Don’tYou20%me”.

Ndryshe, përpos shumë personaliteteve shqiptare nga fusha të ndryshme, lutje për regjistrim drejtuar shqiptarë nga Maqedonia Veriore, iu ka bërë edhe kryetari i Aleancës për Shqiptarë, Zijadin Sela, i cili pos tjerash ka thënë:

“Regjistrohu dhe mos hiq dorë edhe kur regjistrimi bllokohet për të qindtën herë, dhe pasi të regjistrohesh sensibilizo ata që s’janë regjistruar që ta bëjnë të njëjtën. Ndihmo dhe inkurajo ata që mund të kenë hequr dorë nga regjistrimi. Regjistrohu dhe dëshmo se nuk shkulesh lehtë nga dheu ku ke mbirë, regjistrohu dhe dëshmo se nuk heq dorë nga toka e babës dhe gjuha e nënës”, ka thënë mes tjerash Sela në video-mesazhin e tij, përcjell albinfo.at.