24 vjet punoi në diasporë, tashmë zotëron fermën e tij në vendlindje

24 vite punë në mërgim

Ded Zefi për 24 vjet ka punuar në ndërtimtari në Greqi dhe Itali. Para 6 vjetësh mori vendimin që të kthehej në Shqipëri.

Pas kthimit nga diaspora, ai hapi një bar kafe, por të ardhurat që i siguronte lokali nuk ishin të kënaqshme. Më 2020 ai vendosi të bëhej fermer, duke ngritur një kompleks gjedhësh, prej 50 viçash, përveç kësaj në këtë tokë ai rrit edhe 700 pula, transmeton albinfo.ch.

“Janë rreth 50 viça të racave të ndryshme, por pjesën më të madhe e ka vendi. Shpresojmë që me kalimin e kohës t’i shtojmë. Pavarësisht se kostoja e ushqimit është rritur shumë.

Cilat janë planet e së ardhmes?

Unë dua të merrem me tregtinë e mishit, pasi të merrem dhe bulmetin nuk ia dal dot. Nëse një prodhim është bio, përse të mos certifikohemi, përse të na konkurrojë mishi i Brazilit që vjen më një kosto shumë të ulët dhe shitet një lloj tek kasapi”, shprehet Ded Zefi.

Po ashtu, Deda thotë se konsumatori duhet të mbështesë prodhimin vendas. Sipas tij, produktet shqiptare janë të pakrahasueshme për nga cilësia me ato të importit.

“Në periudhën e Covidit ka pasur shumë punë, pasi vijnë tregtarët dhe i marrin më pas ia shesin konsumatorit. Ai që vjen një herë të blejë këtu, më pas do të vijë gjithmonë”, thotë Zefi./TopChannel

 

---