Papa Françesku bën thirrje për paqe

Papa Françesku bëri thirrje të dielën për t’i dhënë fund konfliktit në Izrael dhe Gaza, duke deklaruar se vdekja e kaq shumë njerëzve në pak ditë është e papranueshme.

“Bëj thirrje për qetësi dhe për ata që janë përgjegjës t’i japin fund zhurmës së armëve dhe të ndjekin shtegun e paqes”, tha Papa në fjalimin e përjavshëm para sheshit Shën Pjetër.

Ai ka theksuar se njerëz të pafajshëm kanë humbur jetën dhe kjo, sipas tij, është e tmerrshme dhe e papranueshme.

“Vdekja e tyre është shenjë se njerëzit nuk duan të ndërtojnë të ardhmen, por ta shkatërrojnë atë. Pyes veten se ku do i çojnë urrejtja dhe hakmarrja”, u shpreh tutje Papa.