Fauci i kërkon Kinës të dhënat mjekësore të shkencëtarëve në laboratorin e Wuhanit

Eksperti i lartë amerikan i sëmundjeve infektive, Anthony Fauci, i ka bërë thirrje Kinës që të lëshojë të dhënat mjekësore të nëntë personave, sëmundjet e të cilëve mund të sigurojnë të dhëna të rëndësishme nëse COVID-19 u shfaq për herë të parë si një “rrjedhje” nga një laborator, raportoi Financial Times të enjten.

“Unë do të doja të shihja regjistrat mjekësorë të tre personave që raportohet se ishin sëmurë në vitin 2019. A u sëmurën ata vërtet dhe nëse po, me çfarë u sëmurën?”, është shprehur Fauci.

Origjina e virusit po diskutohet shumë, me agjencitë e inteligjencës amerikane që ende ekzaminojnë raportet se studiuesit në një laborator kinez të virologjisë në Wuhan ishin të sëmurë rëndë në 2019,  një muaj para se të raportoheshin rastet e para COVID-19.

Sidoqoftë, shkencëtarët dhe zyrtarët kinezë vazhdimisht kanë hedhur poshtë hipotezën e daljes së virusit nga një laborator, duke thënë se virusi mund të ketë qarkulluar në rajone të tjera para se të godiste Wuhan dhe madje mund të ketë hyrë në Kinë përmes dërgesave të importuara të ushqimeve të ngrira ose tregtisë.

Financial Times raportoi se Fauci vazhdon të besojë se virusi u transmetua për herë të parë tek njerëzit përmes kafshëve, duke theksuar se edhe nëse studiuesit e laboratorit do të kishin COVID-19, ata mund të kishin marrë sëmundjen nga popullata e gjerë.